Geguritan

GEGURITAN

IBU

Dening : WandyoSupriyatno

Ibu...kula nyuwun pangapunten...

Putra mboten saged atur kamulyan...

Putra sekeng...nalika ibu seda 4 taun kepengker!!!

Donga iku kang terus kaucapake...

Nalika aku nyekar ing pasareyane ibu...!

Luh ndlewer...mbrabak mripat iki...

Ngelingi jaman rekasa biyen...!

Aku, bapak, kakang, lan adhiku...mangan sega uleng...!

Dhek jaman semana...nalika pangan dadi barang langka!!

Aku semedhot...ngelngi jaman iku...

Ndlosor...sujud mring Gusti...kebak bekti lan pasrah...

Sinambi sambat...geneyaurip amung kebak kesangsaran!!

PEMUJA RAHASIA

Dening : Shinta Devi

Ora apa-apa kanggoku,

Ora tau krungu swaramu,

Ora tau kokwenehi esemmu,

Ora tau weruh anganmu,

Aku ora apa-apa,

Angger guyumu isih kuwawa nuwuhake sesuketan garing,

Angger esemmu esih nyunari bawana rina wengi,

Angger atimu isih kinemulan setaning lamuk ing tawang,

Aku ora apa-apa,

Senajan jangkahmu ora nuju menyang aku.

  

LUHING KATRESNAN

Dening : Mariyati

Mripatku kembeng-kembeng

Ngampet perih ing netraku

Mendhung petheng dhedhet

Gumandhul ing langit ireng sap pitu,

Luhing katresnan

Ngipatake jiwa kang ringkih

Nganti budhas kebak tatu biru,

Luhing katresnan

Nyiyutake panjangkaku

Njambak praupanku sing abang mbranang

Nggiles tandhes katresnanku,

Luhing katresnan

Nyebul mlendhung rasa gethingku

Nganti mbledhos nuwuhake gandha amis

Tumpleg bleg ngebaki kalbu

WIS ADOH

Dening : Suhindriyo

Wis adoh tlapake,

Awangun sandi ukara

Ukara

Kridha basa

Apa banjur,

Mung pantes dipendhem jero

Ukarane para nujum

Sing ditulis dadi rajah

Semlempit ing longan

Dlika aclum

Wis adoh, kalane

Srengenge nguber imbang pracima

Sing ungub-ungub sikile jaladri

Nggoleki critane Bima Suci

Ing pewayangan, destun

Ana ukara

Tinata tharik urut kacang

Ana lengkehe gunung bebanjengan

Banjur lelagon sesendhonan

Rame gumerah ing plataran jembar

Nalika rembulan coblong

Jagad urip kari sagodhong ganyong

ZIARAH

Dening : Esteanto Gimanasaputra

Sing teka banjur adus waspa

Sinambi titip kembang marang watu nisan

Sawise kuwi lali dina wengi

Pasareyan bali sepi

GURIT

Dening : Esteanto Gimanasaputra

Gula kopi karendhem banyu panas

Ing njero gelas

Mendheg-mendheg

Ora ana sing ngudheg !



KATRESNAN
 

Katresnan iku geguritaning urip sejati
Pepadange sakjroning pepeteng
Biso di gawe nanging ora biso digawe-gawe

Katresnan iku kasunyatan ngedohi tumindak dudu
Kayadene: drengki, srei, dahwen lan pati open

Katresnan iku larang regane ora biso di tuku
Lan di tiru sarana bandha donya lan raja brana
liyane, jalaran toh-tohane Nyawa

Katresnan iku dalan kang tumuju marang bebener
kebak deneng rasa lan pepadhang
lila lan legawa lair tumusing bathin
kaya dene gegodhongan kang googrok saka uwit
ora ngarep-arep bakal baline
melu ngrasakake panandhanging liyan

Katresnan iku ora mbedak-bedakakeh
Cendhek duwuring pangkat
Asor Luhuring Drajat
Lan gegebengane urip kang rinasuk
ananing mung welas lan asih
suka pitulung marang sapa bae

Katresnan iku prayata umur tuuwa, dudu umur dawa
urip tanpo cacar ing ngarsane Pangeran
Sing nguasai pati lan urip

Pahlawanku

(R. Tantiningsih)

Pahlawanku
Wutahing ludirmu

Nyiram ibu pertiwi

Nadyan sang ibu

Kudu muwun sedhih

Karajang-rajang manahe

Karujit-rujit rasa pangrasane

Pahlawanku

Mugya Gusti paring nugraha

Semana gedhene bektimu

Jiwa raga, bandha donya

Tanpa sisa

Amung siji pangajabmu

Merdika

Segara Aru

(Hisyam Z)

Bener, pener, yekti

Sliramu dadi seksi

Seksi pahlawan sejati

Pahlawan mulih aran awit bekti

Awit mangku jejibahan

Tugas luhur, jujur ing palagan

Ngemban amanat Trikora ayahan

Segara Aru biru lugu blak-blakan

Ngemu madu

Maduning bangsa satuhu

Kang Asma Yos Sudarso iku

Korban jiwa raga ing Segara Aru

Ludira kang wekasan

Kanggo nebus Irian

Yos Sudarso gugur kalayan

Asmanya misuwur ing bebrayan

Sliramu Aru

Seksi lugu

Seksi bisu

Satuhu baku

Valentine

 Tanpa upama bungahe driya

Angles rasa ndika tanggap sasmita

Mangayubagya nugraha dalem awujud tresna

Bengi tanggap warsa iku nimas

Awale laku dak dhodhog kori atimu

Tanpa kedale lesan

Agawe mulak-mulak jaja kadya kinubere

Kawah Candradimuka

Nanging ing prastawa iku esemu nyimpen prajanji

Ili laku kumricike panganti

Nganthi esem teleng ati

 Geter rasa krudha asmara

Tanpa suwala lilin iku luluh

Rikala dina asih tresna

Esem ngujiwat

Sumunar mbirat rasa samudana

Ndika walaka sajrone driya

Andum rasa nggayuh tresna

Mecaki dawane mangsa

PIWELING

                                 

Aku ngugemi ngendikanmu, Ibu
Nalika arep budhal sekolah
Nyangking tas kebak buku
Ngger, jagad iki amba  tebane
Aja cilik ati
Kabes bisa karengkuh
Kanthi gelmu
Ngger , ngendikane pujangga winasis
“Ngelmu  iku, kalakone kanthi laku
Lekase lawan kas
Tegese kas ngantosani
Setiya budya pangekesing  durangkara”
Pancen angel yen durung ketemu
Mula aja pegat sinau
Dadia wong pinter nanging
Aja keminter lan keblinger
Dadia wong sugih nanging
Aja sumugih
Dadia petinggi nanging
Aja ngapusi lan korupsi

ANDHIK ALA
                                    
 Wanci surup
Pindha mawa
Bagaskara katon bang mawinga-winga
Binareng tumekaning ratri
Samubarang kudu diayahi kanthi setiti, ngati-ati
Ora kena grusa-grusu
Sing sareh aja kesusu
Mengko mundhak kesuru
Wanci surya angslup
Ana pangkoning ibu pertiwi
Ana janma tan kasat netra
Tarkadhang manjalma
Mula samubarang sing menga
Uga kahanan kang tinarbuka
Enggal diinepna
Kanthi nyenyuwun lan ndedonga
Supaya kabeh diparingi


UJIAN NASIONAL

Pasuryan katon nggembol sanggan kang abot
Padha pucet, ndingkluk
Tumungkul amarikelu
Sajak nduweni sanggan kang maewu-ewu
Telung ndina dipecaki
Suwene kaya sewindu
Rasane kaya dhadha ditujes sewu eri
Perih, linu,lan ngilu
O…. ujian nasional
Kaya ngene abote
Mangka anggonku sinau luwih saka sewu dina
Ning nasibku ditemtokake amung telung ndina
Upama biji rapot bisa kanggo tetimbangan
Mesthine sangganku ora abot temenanan
O… ujian nasional
Aku pasrah amarga sistem isih feodal